बडो मुस्किलले तिमीलाई किनारामा अल्झाएको छु!!।

 गजल

तिमीलाई सजाउने होडमा कयौं ठक्कर खाएको छु

आफू डुब्दै छु जान्दाजान्दै पनि तिमीलाई  बचाएको छु

जलाएर के तिमीलाई पुगेन र ?अझै घोच्दै छौ फर्किफर्कि

को आफ्नो हो, को हो पराइ ,राम्रोसँग थाहा पाएको छु

मलाई नरोक एकैछिन म घरबाट हिँडसकेको यात्री हुँ

समयमै पुग्नु छ मैले पनि कसैलाई बाटोमा पर्खाएको छु

कताबाट  लुछन मन लाग्छ, लुछ मासु मिलाई मिलाई

सुन,तिमीले यसरी लुछिदिएर नै म मूर्ति कहलाएको छु

भुलेर पनि सागरमा फेरि हेलिने कोसिस गर्दै नगर्नू

बडो मुस्किलले तिमीलाई किनारमा अल्झाएको छु

लेखक :

हर्क दुलाल 

श्री आदर्श माध्यमिक विद्यालय 

बराहक्षेत्र-२, चतरा,सुनसरी